პროფ. სერგი მაკალათიას სახელობის  გორის ისტორიულ-ეთნოგრაფიული მუზეუმი

1935 წელს შიდა ქართლის კულტურული მემკვიდრეობისა და მრავალფეროვნების კვლევისა და დაცვის მიზნით გორში დაარსდა მხარეთმცოდნეობის მუზეუმი. რომელიც პირველივე დღიდან იქცა რეგიონის უმთავრეს კულტურულ-საგანმანათლებლო ცენტრად. წლების განმავლობაში მუზეუმის მიერ წარმოებული საველე-საექსპედიციო სამუშაოების შედეგად უნიკალური მასალებით შეიქმნა და შეივსო მუზეუმის ძირითადი ფონდი. დღეისათვის მუზეუმი ფლობს 110 000 ზე მეტ ექსპონატს, რომელიც საკმაოდ მრავალფეროვანია და მოიცავს ძვ.წ. IV ათასწლეულიდან დღემდე ნიმუშებს: არქეოლოგია, ნუმიზმატიკა, ეთნოგრაფია, ფერწერა, სახვითი და გამოყენებითი ხელოვნების ნიმუშები, უძველესი ხელნაწერი საბუთები, პირველნაბეჭდი წიგნები, პირადი არქივები, კინო-ფოტო-ფონო მასალა და სხვა. მუზეუმს გააჩნია მდიდარი სამეცნიერო ბიბლიოთეკა დაკომპლექტებული იშვიათი გამოცემებით და პერიოდიკით. დღესდღეობით  მუზეუმის განვითარების სტრატეგია მიმართულია არსებული მასალის თანამედროვეობის ჭრილში წარმოჩენაზე და მათი მნიშვნელობის ფართო აუდიტორიისთვის მიწოდებაზე. მუზეუმი ჩართულია კულტურული ტურიზმის განვითარების და ამისათვის მიმზიდველი გარემოს შექმნის საქმეში. თანამშრომელთა გუნდი მუდმივად ზრუნავს განვითარებაზე და ამისათვის აქტიურად ერთვებიან სხვადასხვა მიმართულების ფორუმებსა და  საგრანტო კონკურსებში.  გორის მუზეუმის მიზანია  შეინარჩუნოს რეგიონის მნიშვნელოვანი კულტურული ჰაბის ფუნქცია, ამისათვის თანამშრომლობს როგორც ადგილობრივ ასევე საერთაშორისო სამუზეუმო გაერთიანებებთან.

სერგი მაკალათიას  სახელობის გორის ისტორიულ-ეთნოგრაფიული მუზეუმის მისიაა მხარის კულტურული მემკვიდრეობის მოძიება-შესწავლა. მის საფუძველზე დაგროვილი საფონდო  მასალის ქრონოლოგიური დაკომპლექტება, კვლევა,  დაცვა და შესაბამისად პრეზენტირება.

მისამართი: გორი, კირიონ II-ის ქ. 12

ტელ:  0370 27 28 67

ელ. ფოსტა: ethnomuseumgori@yahoo.com