ლანჩხუთის  მხარეთმცოდნეობის  მუზეუმი  დაარსდა  1978 წელს, ხოლო  მუდმივმოქმედი  ექსპოზიცია  გაიხსნა  1998  წელს.  საველე-საექსპედიციო  სამუშაოების  შედეგად  მუზეუმის  ფონდი შეივსო  წლების  განმავლობაში  და  ძირითად  ფონდში  გატარებულია  10000- მდე  ექსპონატი.  მუზეუმში  გახსნილია  ბუნების,  არქეოლოგიის, ეთნოგრაფიის,  ისტორიული  წარსულის  ამსახველი  ექსპოზიცია. ასევე  პრეზიდენტის  გრანტის  საშუალებით  2018  წელს  გაიხსნა  ოკუპაციის  მუზეუმი.

მუზეუმის  ექსპონატები  საკმაოდ  მრავალფეროვანია  და  მოიცავს მასალებს   ნეოლითის  ხანიდან  დღემდე,  არქეოლოგია,  ნუმიზმატიკა, ეთნოგრაფია, ფერწერა, სახვითი და გამოყენებითი ხელოვნების  ნიმუშები, უძველესი  ხელნაწერები, პირადი  არქივები,  კინო-ფოტო-ფონო მასალა.   ექსპოზიციაში  წარმოდგენილია  მუნიციპალიტეტის  ტერიტორიაზე  მოპოვებული  ბუნებრივი  წიაღისეული  ტორფი,  ნავთობი,  მინერალები  ე.წ.  ცარცული  პერიოდის  მასალები.

არქეოლოგიის  განყოფილებაში  გამოფენილია  ნეოლითის,  ადრე  და  გვიან  ბრინჯაოს  ხანის  ექსპონატები, ძვ. წ.IVს-ის ბრინჯაოს მუზარადი, ამავე პერიოდის  აქემენიდური  ბრინჯაოს  ლაგამი,  ანტიკური  ხანის  კერამიკა  და  სხვა  მნიშვნელოვანი  ექსპონატები. XIს-ის  ლაპიდარული  წარწერა  ქვაზე  და  სხვა. მუზეუმში არის  დაცული  გურიელების  ნაქონი  ავეჯი  და  ნივთები,  მუსიკალური  საკრავები,  ხელნაწერები  და  იშვიათი  გამოცემები.  ვრცლად  არის  წარმოდგენილი  გურული  ცხენოსნების  ამერიკასა  და  ევროპაში მოგზაურობის  ამსახველი  ფოტო  და  დოკუმენტური  მასალა.     მუზეუმში  გაკეთდა  ეთნოგრაფიული  ეზო  და  გურული  სამზადი  სახლი.

მუზეუმი თანამშრომლობს  სხვა  სამუზეუმო  გაერთიანებებთან, თანამშრომლები  აქტიურად  არიან  ჩართულნი  სხვადასხვა  მიმართულების  ფორუმებსა  და  კონფერენციებში,   მუზეუმში  ტარდება  ექსკურსიები,  მუშავდება  სამეცნიერო  თემები,  ხორციელდება  საგანმანათლებლო  შემეცნებითი  პროექტები  სკოლის  მოსწავლეებისთვის.

მუზეუმის  მისიაა  მხარის  კულტურული  მემკვიდრეობის  შესწავლა, ექსპონატების  მოძიება  და  ფონდის  შევსება.

მისამართი: ლანჩხუთი, ნინოშვილის 21, მხარეთმცოდნეობის მუზეუმი

ტელეფონი: +995 599 22 20 73