გიორგი ხორგუაშვილის სახელობის კასპის მხარეთმცოდნეობის მუზეუმი
კასპის მხარეთმცოდნეობის მუზეუმი დაარსდა 1960 წლის 22 ივნისს. იმ დღიდან მოყოლებული მუზეუმმა მნიშვნელოვანი როლი ითამაშა მხარის წარსულისა და თანამედროვეობის შესწავლის საქმეში. თავდაპირველად მუზეუმი მდებარეობდა ახლანდელ კოსტავას ქუჩაზე. 1968 წლიდან გადმოტანილ იქნა სააკაძის ქუჩა (ყოფილი სტალინის ქუჩა) N 88 -ში მდებარე შენობაში, რომელშიც სხვა უწყებებიც იყო განთავსებული. 1992 წლიდან აღნიშნული შენობა მთლიანად დაიკავა მუზეუმმა. მუზეუმის პირველი ექსპოზიცია გაიხსნა 1963 წელს. შემდეგ გაკეთდა ორი რეექსპოზიცია. კასპის მხარეთმცოდნეობის მუზეუმის ფონდებში დაცულია 35000-ზე მეტი ექსპონატი: გეგმიური არქეოლოგიური გათხრების შედეგად მოპოვებული და შემთხვევით ნაპოვნი საყურადღებო ნიმუშები, მდიდარი ეთნოგრაფიული და ნუმიზმატური მასალა, ფერწერული ტილოები, რაიონის ცნობილ ადამიანთა არქივები და სხვა. წლების განმავლობაში კასპის მხარეთმცოდნეობის მუზეუმი იყო მეთაური მუზეუმი მუნიციპალიტეტში არსებულ ფილიალებთან ერთად, რომელთა ფონდებიც ამჟამად ერთიანდება კასპის მხარეთმცოდნეობის მუზეუმში: ხოვლეს ივანე ჯავახიშვილის სახლ-მუზეუმი(1969წ) , სასირეთის გენერალ გიორგი მაზნიაშვილის სახლ-მუზეუმი(1996წ) , ლამისყანის ჯამბაკურ-ორბელიანთა სასახლე-მუზეუმი(1985). სამივე მუზეუმის დაარსება და გახსნა კასპის მხარეთმცოდნეობის მუზეუმის ხელმძღვანელობისა და თანამშრომელთა დამსახურებაა. 2007 წლიდან კასპის მხარეთმცოდნეობის მუზეუმი სხვა მუზეუმებთან ერთად შევიდა კასპის მუნიციპალიტეტის მუზეუმების გაერთიანების დაქვემდებარებაში. 2013 წელს კასპის მხარეთმცოდნეობის მუზეუმს მიენიჭა მისი ყოფილი დირექტორის, მწერალ გიორგი ხორგუაშვილის სახელი. 2015 წელს გაიხსნა ახალი ექსპოზიცია ორ დარბაზში:ე.წ "არქეოლოგიისა" და შუა საუკუნეების დარბაზები". 2018 წელს განახლდა "ქართლური დარბაზის" ექსპოზიცია.
მხარეთმცოდნეობის მუზემის მისიაა რეგიონის ისტორიული, არქეოლოგიური, ეთნოგრაფიული, ბუნებრივი და კულტურული მემკვიდრეობის კვლევა, დაცვა, შენახვა, პოპულარიზაცია და საზოგადოებისთვის ხელმისაწვდომობის უზრუნველყოფა განათლების ხელშეწყობის მიზნით.
მისამართი : კასპი, სააკაძის N88
ტელ: 0371222 2414
ელ.ფოსტა: mmuzeumi@gmail.com
